Khawzawl District Election Officer Pu Pu K Lalrohlua, District Bawrhsap leh District Election Officer ni bawk chuan vawiin chawhma dar 9:30 khan 2nd Special Summary Revision of Photo Electoral Roll, 2023 neih tur atan 22-Tuichang Constituency (ST) Assembly Constituency Draft Electoral Roll chu DC Conference hall-ah a tlangzarh a, political party aiawhte hnenah Draft Electoral Roll bu hi a sem chhuak nghal a ni.

            Bawrhsap chuan, kum 2018 MLA General Election-ah khan 22 Tuichang (ST) Assembly Constituency-a vote tla chu Mizoram puma vote tla chawhrual aia a tlem thu a sawi a, vote tlak chhiat chhan zirchianna neih a ni a, hnathawka hmun danga awm leh zirlai hmun danga awmte tel lo pawhin vote tla hi a tha lo tih sawiin, kumin inthlanpui neih tur ah chuan zaa 80 tal tlin tura tan lak a ngai a, Khawzawl khawpui chhungah pawh tan lak a ngai hle a ni a ti.

            Tin, bawrhsap hian MLA General Election kan hmachhawn turah MPF leh political party hrang hrang inremna angin inthlan puan hma chu house to house campaign neih phal a nih thu sawiin, hemi hnu lamah chuan a theih tawh dawn loh a ti a. Social media lam pawh a enkawltute hriattirna pek vek tum a nih thu sawiin, politics sawihona group ni loah chuan politics lam hawi sawi phal a ni dawn lo a ti a. Social Media a chak tawh avangin Election Deparment lam pawh hemi kawngah hian an tang hle a ni a ti bawk.

            Draft Electoral Roll 2023, tlangzarh atanga a lan danin Khawzawl District chhunga Assembly Constituency pakhat, 22-Tuichang AC huamchhunga Polling Station 28 ah vote nei mi 17,900 (mipa 8,690 leh hmeichhia 8,750) an awm a, mipa aiin hmeichhe vote nei hi 60 in an tam zawk a ni. Khawzawl Vengthar North Polling Station-ah vote nei tam berin 1,025 an awm a, vote 114 awmna Arro Polling Station chu vote nei tlem ber a ni.

2nd Special Summary Revision of Photo Electoral Roll, 2023 ah hian qualifying date chu October ni 1, 2023 a ni a, hemi ni a kum 18 tling hman tur India khua leh tui dik takte tan Booth Level Officer te kaltlangin Electoral Roll-a inthun dil theih a ni a, hemi rual hian siam that ngai siam, paih ngai paih leh insawn duhte siam fel theihna hun pawh hawn a ni a. 

            Special Summary Revision of Photo Electoral Roll 2023 kaltlang hian August ni 2, 2023 atanga August ni 31, 2023 chhungin Electoral Roll-a inthun, paih, insawn leh siam that, dilna thehluh theih a ni a, September ni 22, 2023 atangin dilna leh rawtna thlente chinfel a ni ang a, tihfel ngai zawng zawng tihfel a nih hnuah October ni 4, 2023 ah Final Electoral Roll tlangzarh tum a ni.