Khawzawl 23rd March, 2022: 

District Election Officer (DEO), Khawzawl District buatsaihin, zau zawka Election chungchang inzirtirna programme, “Systematic Voters Education and Electoral Participation” (SVEEP) hnuaiah vawiin khan SVEEP Poster tarchhuah tan a ni a. DEO Khawzawl enkawl Tuichang Assembly Constituency huamchhunga Booth Level Officer (BLO) ten an bial chhung theuha hmun lun leh langsar laiah Poster te hi an tarchhuak a ni. 

 

Poster ah te hian SVEEP Slogan inphuahsiak buatsaih hnuhnung bera slogan tha bera thlan pahnih, “Khua leh tui tha ni turin roll-ah i chuang dun ang” tih leh “Midangte thlan sa sawiseltu mai ni lovin, i ram leh hnam hmasawn nan nangmah ngeiin dik takin vote thlak ve rawh le” tih te tarlan a ni. 

 

Polling Station huamchhung hmun lun laia SVEEP Poster tarchhuah hi mipui tam zawkin Electoral Roll a inziahluh leh, Election kaihhnawiha tel ve tura sawmna thuziakte an lo hmuh a, chumi lam hawia rilru an pek a ke an pen theih nan tih a ni a. Tuichang Assembly Constituency huamchhungah hian Polling Station 28 awm in, kumin January ni 15 Electoral Roll tlangzarh hnuhnung berah voter 17,250 an awm a ni.


Written by H. Lalramenga, SDC/EO, Khawzawl District