Khawzawl, the 5th October, 2021:
Vawiin khan Multipurpose Hall, Government Khawzawl College-ah District Election Office leh Department of Political Science, Govt. Khawzawl College tangkawpin “National Seminar on Electoral Literacy and Participation” buatsaih a ni a. He hun hi Pu C.C. Lalchhuangkima, District Election Officer, Khawzawl District, Deputy Commissioner ni bawk chuan Khuallian niin a hmanpui.
Seminar hawnna hun Pi Lalthlamuani, HOD, Department of Political Science kaihhruaiah Pu C.C. Lalchhuangkima chuan thu sawiin, Democracy rama thil pawimawh tak Election chungchang seminar buatsaih a ni chu thil lawmawm tak a ni, a ti a. India rama Election kalphung chu rintlak leh belhchian dawl, khawvel ramdangte pawhin an entawn a nih thu a sawi. Miin Election kaihhnawiha hriattur pawimawhte a hriatchian loh chuan thu lengvak tamtak lakah a him loh phah thin a ni a ti a. Mizoramah chuan inthlan dawnah Sawrkar leh NGO, a bikin Mizoram People’s Forum (MPF) te thawhhona a that thin avangin India ramah pawh inthlanna felfai, mipui pawh an nungchang a thatna leh uchuak taka sum hman pawh tlemna hmun a ni, a ti bawk.
Pu H. Lalramenga, Election Officer pawhin thu sawiin, Electoral Literacy chu ram hnuih khawih pha, ram inrelbawlna nghawng a ni a ti a. Mipuiin Election kaihhnawiha hriat tur pawimawhte kan hriatchian a, kan inrawlh tam poh leh Democracy a chak thin a ni tih sawiin, zirlaite chu Electoral Roll-a an inziahluh theih ve leh inziaklut tur leh, Election a awm leh huna vote thlak ngei turin a chah bawk a ni.
Seminar hawnna hunah hian Pu R. Lalrintluanga, Principal, Government Khawzawl College in Welcome Speech a sawi a, Pu K. Lakulhpuia, Assistant Professor & Co-Ordinator in inhmelhriattirna hun a hmang bawk a ni.
Vawiina “National Seminar on Electoral Literacy and Participation” ah hian Government Khawzawl College bakah Govt. Champhai College leh Govt. Saitual College atanga Resource Person sawm bikten a hnuaia Electoral Literacy kaihhnawih theme hrang hrang tarlan pasarih (7) ah zirtirna an pe a ni:
Vawiina Seminar-ah hian Khawzawl Town chhunga Booth Level Officer (BLO) te, Sub-Headquarters YMA, Khawzawl aiawh te leh Mizoram Journalist Association member te an tel a ni.
Theme-I : Significance of Electoral Literacy for a Stronger Democracy
Theme – II : Electoral Participation in Mizoram: An Overview
Theme – III : Social Media: A medium of Political Participation
Theme – IV : A comparative Study of Mizoram: Electoral Participation in Mizoram Legislative Assembly and Lok Sabha Elections since 1970
Theme – V : A study of Pre-Colonial to Post-Colonial Mizo Society with Special Reference to the Evolution of System of Government
Theme – VI : Electoral Literacy: A historical Study of Elections in India with Special Reference to Mizoram Politics (1954 – 1987)
Theme – VII : Significance of Electoral Literacy to form the Right Government
Written by H. Lalramenga, Election Officer/SDC, Khawzawl District
