Khawzawl, the 14^th December, 2021

Khawzawl District chhunga Special Summary Revision of Electoral Roll, 2022 kalpui mek endik tura Election Commission of India (ECI)-in a ruat, Electoral Roll Observer Dr. Lalzirmawia Chhangte, IAS chuan vawiin khan Khawzawl a tlawh a. Election Official te bakah political party hrang hrang, NGO leh Mizoram Journalist Association aiawhte chu Khawzawl DC Conference Hall-ah Special Summary Revision of Photo Electoral Roll, 2022 kalpui mek chungchang a sawipui.

Pu Lalrohlua, Additional Deputy Commissioner, Khawzawl District kaihhruaiah Electoral Roll Observer Dr. Lalzirmawia Chhangte chuan thu sawiin, Special Summary of Photo Electoral Roll (SSR), 2022 kalpui mek tluang leh felfai taka kalpui a nih theihna tura Election Commission of India (ECI) in a ruatna bawhzui a ni, a ti a.  India ram chu democracy ram, mipuiin an aiawha roreltu tur an thlan thinna a ni a. Inthlanna felfai leh thianghlim nei tur chuan Electoral Roll dik leh felfai neih a pawimawh hmasa a, chuvangin ECI pawhin Roll Revision chu a ngaipawimawhin, dan ang taka dik taka kalpui a ngai tih a sawi a ni. 

Roll Observer chuan sawi chhunzawmin, Khawzawl District-a Roll Revision kalpui dan a lungawithlakin a tha hle a ni, a ti a. Election Official te leh political party, NGO leh press mite inkara thawhhona tha tak awm chu lawmawm a tih thu a sawi. Tin, Electoral Roll a luh chu India khua leh tui te chanvo bik a ni tih tarlangin, Roll Revision chu India khua leh tui nih dilna a nih loh thu a sawi bawk a ni. 

He hunah hian Pu H. Lalramenga, Election Officer chuan Khawzawl District-a SSR, 2022 report a pe a. Roll Revision-ah hian Khawzawl District Election Officer hnuaiah 22-Tuichang Assembly Constituency awmin, DEO leh Electoral Registration Officer (ERO) pakhat ve ve an awm a, Assistant ERO pahnih leh Booth Level Officer (BLO) 28 an awm a ni. Draft Electoral Roll-a a lan danin voter awm zat hi mipa 8501, hmeichhia 8467, an vain mi 16968 an ni a. Tun dinhmunah Form 6 kaltlanga Electoral Roll a luh dilna 535, Form 7 hmanga roll atanga paih dilna 196, form 8 kaltlangin siamthat dilna 155 leh form 8A hmangin insawn dilna (Constituency khat chhungah) 49 dawn a nih tawh thu a tarlang. Heng form lutte hi BLO kaihhruaiin VC, NGO leh political party ten an endik hnuah AERO ten a hmunah kala an enfiah vek thu a tarlang bawk a ni. 

Election chungchang inzirtirna, Systematic Voters’ Education and Electoral Participation (SVEEP) kaltlanga hmalakna hrang hrang pawh tarlan niin, SSR 2022 pualin Electoral Roll a inziahluh pawimawhna tilang thei Slogan inphuahsiak te, form thehluh tur nen BLO thla lakpui a lawmman dawn theihna, “Photo with my BLO” campaign te, Khawzawl District chhunga milarte nen promotional video siam te, Khawzawl leh Khawhaia zirna inahte Electoral Literacy Club din a nih thu te ngaihthlak a ni bawk. 

SSR, 2022 atan  hian qualifying date chu January Ni 1, 2022 a ni a, hemi ni a Kum 18 tling hman tur India khua leh tui (citizen) dik takte chuan November ni 1 atanga ni 30 thleng khan Electoral Roll-ah luh an dil thei a ni. Hemi rual hian siam that ngai siamthat, paih ngai paih leh insawn duhte siam fel theihna hun hawn a ni bawk. Heng dilna lutte hi December ni 20, 2021 ah chinfel hman tur niin, ruahman lawk dan chuan Electoral Roll thar ber ni tur hi January Ni 15, 2022 ah tlangzarh tum a ni.

Written by H. Lalramenga, SDC, Khawzawl District