Khawzawl, the 11th February, 2022:

Vawiin khan National Service Scheme (NSS) Unit, Government Khawzawl College leh Office of District Election Officer, Khawzawl District tangkawpin Government Khawzawl College-ah a duh apiang tana thisen pek na, Blood Donation Camp an buatsaih a, Multipurpose Hall, Govt. Khawzawl College-a a hawnna hun chu Pu Lalrohlua, Additional Deputy Commissioner, Khawzawl District chuan Khuallian niin a hmanpui. 



Pu K. Ziona, NSS Programme Officer kaihhruai Blood Donation Camp hawnna hunah hian Khuallian Pu Lalrohlua chuan thu sawiin, thisen pek chu kan mihringpuite nunna chhan theihna pawimawh tak a ni a, mithiamte tarlan danin thisen vawikhat pek hian nunna pathum a chhan thei a ni, a ti a. Medical Science thiamna sang zelah damdawi leh inenkawlna tha pui pui a awm tawh laiin, mihringin kan mamawh tak thisen erawh Science thiamna hmanga siam theih a la ni lo a, mihringin kan mihring puite hnenah vek pek a ngaih avangin thisen pek chu a hlu bik hle a ni, a ti. 

 

Additional DC chuan sawi chhunzawmin, thisen pek chuan cancer vei theihna chance tihniamin, taksa-a thau chhia leh Cholesterol level a tihniam thei a, taksaa thisen (Red Blood Cells) insiam a tihchak mai bakah thisen petu rilru hriselna thlengin a pui thei a ni, a ti. Thisen pe tura kalkhawmte chu Electoral Roll-a inziahluh leh inthlan huna kan chanvo hlu tak vote thlak ngaipawimawh thar leh turin a chah bawk a ni. 

 

He hunah hian Pu H. Lalramenga, Election Officer, Khawzawl District pawhin kalkhawmte chu Electoral Roll-a inthun mai duhtawk lovin, voter rinawm leh suma lei theih loh, ngaihtuahna fim tak senga vote thlak thin ni turin a sawm a. Election Commission of India duhdana inthlanna thianghlim leh langtlang, a result pawh mipui nawlpuiin kan pawm tlan theih nei tur chuan voter te kan rinawm hmasak a ngai a, chu chuan ram rorelna tha a thlen thin a ni, a ti. District Election Office leh Government Khawzawl College-a Electoral Literacy Club ten thawhhona tha tak an nei thin chu lawmawm a tih thu sawiin, SVEEP hnuaia Khawzawl District-a hmalak tawhna leh hmachhawp awm mek te a tarlang bawk a ni. 

 

Blood Donation Camp-ah hian Champhai District Hospital (CDH) atangin thisen la tur team an rawn kal a. CDH Medical Officer Dr. TC Lalramengmawia chuan Blood Bank ah thisen mamawh ang a awm lo fo thin tih a sawi a. A thlawna thisen dawnte chu a mamawh hnenah a thlawna pekchhuah thin a ni a,  kan taksaa Red Blood Cells te chu ni 120 dan zela inthlak thin an nih avangin thisen pek a uiawm loh a ni, a ti a. Chhan hrang hrang vanga thisen pe thei lo an awm theih dan te tarlangin thisen pe tura kalkhawmte chungah lawmthu a sawi bawk a ni. 

Thisen pek runpui hawnna hunah hian Pu R. Lalrintluanga, Govt. Khawzawl College Principal in kalkhawmte lawmna thu sawiin, Pu Joseph Vanlalnghaka, Assistant Professor in inhmelhriattirna hun a hmang a, Pu Lalrammawia, LDC, DEO’s Office in lawmthu sawina in hun a khar a ni. 

 

Vawiina Blood Donation Camp-ah hian NSS Unit, Government Khawzawl College member-te leh DC Office a thawkte bakah Khawzawl District chhunga mi thahnemngaiten an pe a. Mipa 55 leh hmeichhia 35 in pein, a vaiin unit 90 pek a ni a, a dahna tur lam indaih loh avangin pe duh mi thahnem takin an pe lo a ni. Thisen pe te hi Election Office leh ELC member ten SVEEP bookmark an lo pe zel a ni.



Written by H. Lalramenga, SDC/EO, Khawzawl District