Vawiin chawhma dar 11:00 khan Pu C.C. Lalchhuangkima, Deputy Commissioner & District Election Officer, Khawzawl District chuan “Ka vote, ka chanvo, ka mawhphurhna” tih thupui hmanga slogan inphuahsiaka lawmman dawngtute hnenah certificate leh pawisa fai a sem.
Pu H. Lalramenga, Election Officer in Slogan inphuahsiak buatsaih a nih dan a sawifiah a. Summary Revision of Electoral Roll, 2022 denchhena District Election Office, Khawzawl District in a buatsaih niin, Election kaihhnawih thil hrang hrang inzirtirna, Systematic Voters’ Education and Electoral Participation (SVEEP) hnuaia buatsaih a ni tih a tarlang a. Electoral Roll-a inziahluh pawimawhna leh Election kaihhnawiha hriattur pawimawhte zau zawka thehdarh a nih theih nan leh, District chhung mipui nawlpuite hriatna tihpun a nih beisei a intihsiakna buatsaih a nih thu a sawi bawk.
Slogan inphuahsiak hi November, 2021 chhungin a duh apiang tan thehluhna hun hawn a ni a. Slogan engemawzat rawn lut atangin lawmman dawngtu turte hi SVEEP Core Committee in a thlangchhuak a ni.
SVEEP Slogan Writing Competition hi category pahnihah then niin, kum 16 chin hnuailam category ah Lalpekhlui (kum 15) d/o Lalfakzuala, Khawzawl Vengthar chu pakhatna niin certificate leh pawisa fai Rs. 3,000/- a dawng a. A slogan chu “Midangte thlan sa sawiseltu mai ni lovin, i ram leh hnam hmasawn nan nangmah ngeiin dik takin vote thlak ve rawh le” tih a ni. Vanlaldampuia (kum 12) s/o Lalringzuali, Khawzawl Zaingen chu pahnihna niin certificate leh Rs. 2,000 a dawng a, pathumna Lalhminghlui (kum 15) d/o Malsawmdawngliana, Khawzawl Vengtharin certificate leh pawisa fai Rs. 1,000 a dawng a ni.
Open Category ah PB Vanlalhriata s/o PB Lalhmingthanga, Khawzawl Zaingen chuan “Khua leh tui ṭha ni turin, roll-ah i chuang dun ang” tih hmanga lawmman pakhatna lain, certificate leh pawisa fai Rs. 5,000 a dawng a. Pahnihna F. Lalmuanawma, Khawzawl Lungvar in certificate leh pawisa fai Rs. 3000 dawngin, PC Zoramsanga s/o PC Lianzuala, Khawzawl Darngawn leh H. Mawipuii d/o H. Lalsiamliana, Dulte ten lawmman pathumna certificate leh Rs. 2,000 an dawng a ni.
Vawiina lawmman semnaah hian lawmman dawngtute bakah SVEEP Core Committee leh Election Branch, DC Office-a thawkte an tel a ni.
Lawmman dawngtu kimchangte:
Category – I (16 years and below) | |||
Position | Hming | Veng/Khua | Slogan |
1st | Lalpekhlui (15 years old) d/o Lalfakzuala | Khawzawl Vengthar | Midangte thlan sa sawiseltu mai ni lovin, i ram leh hnam hmasawn nan nangmah ngeiin dik takin vote thlak ve rawh le. |
2nd | Vanlaldampuia (12 years old) s/o Lalringzuali | Khawzawl Zaingen | Ka puitlin hunah chuan ka vote hlu tak hi hralh lovin, ka mi duh ngei ka vote ve ang. |
3rd | Lalhminghlui (15 years old) d/o Malsawmdawngliana | Khawzawl Vengthar | Ram hmasawnna tur atana i mawhphurhna chu vote thlak hi a ni |
Category – II (Open) | |||
Position | Hming | Veng/Khua | Slogan |
1st | PB Vanlalhriata s/o PB Lalhmingthanga | Khawzawl Zaingen | Khua leh tui ṭha ni turin, roll-ah i chuang dun ang. |
2nd | F Lalmuanawma | 2nd IR Bn Complex, Khawzawl Lungvar | Enroll timely, Vote responsibly and have a responsible government |
3rd | PC Zoramsanga s/o PC Lianzuala | Khawzawl Darngawn | I vote hlu tak hmangin, i ram siam tha rawh |
3rd | H. Mawipuii d/o H. Lalsiamliana | Dulte | Vote hmang a ram rorel khawl siamnaah i tel ve theih nan Electoral Roll-ah inziak lut ngei ang che |
Written by H. Lalramenga, SDC/EO, Khawzawl District
Attachment
