Khawzawl, the 25th January, 2022

Vawiin chawhma dar 10:30 khan National Voters’ Day (NVD) pualin Khawzawl Zaingen YMA Hall-ah hun hman a ni a. Khuallian Pu C.C. Lalchhuangkima, Khawzawl District Bawrhsap, District Election Officer ni bawk chuan vote nei thar mi 10 hnenah EPIC leh NVD Badge a sem chhuak a, Pu Rohmingliana, Khawzawl Darngawn BLO hnenah Best BLO Award a hlan bawk.



 

Additional DC Pu Lalrohlua kaihhruaia hun hmanah hian Khawzawl District Election Officer Pu C.C. Lalchhuangkima chuan inthlan chu democracy lungphum pawimawh tak a ni tih sawiin, inthlanna thianghlim, felfai leh rintlak, result pawh  mipuiten lungdam taka kan pawm tlan thlap a awm theih nan, vote nei zawng zawngin dik takin vote thlak se tih chu Election Commission of India duhdan leh hmathlir a ni tih a tarlang a. Chutianga inthlanna felfai leh thianghliam nei tur chuan voter te an pawimawh a. Miin ngaihtuahna fim tak seng chunga vote a thlak theih nan leh, inthlan chungchanga miin hriatna a neih belh zel theih nan, ECI din champha denchhenin National Voters’ Day hman thin a ni, a ti bawk. 

 

District Election Officer chuan sawi chhunzawmin, Mizoram People’s Forum (MPF) ten thahnemngai taka inthlan an vil thin avangin Mizoram chu kan vannei hle a ni, a ti a.  MPF hnathawh chu ECI pawhin tha tih thu a tarlang bawk. Kalkhawmte chu beisei let neih vang ni lo, ram tana kan mawhphurhna leh rawngbawlna a nih vang zawka vote thlak thin tur leh, midangte pawh zirtir a, hrilhhre thin turin a chah bawk a ni.   



 

Vawiina National Voters’ Day hmanna-ah hian Pu James Lalnithanga, SDO(Sadar), 22-Tuichang (ST) Assembly Constituency ERO ni bawk chuan NVD Pledge (Thutiam) sawirualna hun a kaihruai a. Pu H. Lalramenga, SDC/Election Officer lawmna sawina hun a hmang bawk a ni. 

 

Zuchhip YMA Hall-a National Voters’ Day lawmna hunah hian Khawzawl town chhunga BLO te bakah voter thar thlanchhuah mi 10 (sawm) te, Village Council, Political Party, NGO leh Khawzawl MJA aiawhte an tel. 

 

National Voters’ Day-ah hian Khawzawl District chhunga BLO ten an bialchhungah theuh voter tharte hnena EPIC semchhuah leh Pledge chhiar rualin hun an hmang a. Khawzawl hmun lun laiah NVD poster tarchhuah niin, he ni pualin awareness video tihchhuah a ni. Sawrkar Office hrang hrangah te NVD Pledge chhiarchhuahna hun hman a ni. Zaingen YMA Hall-a NVD puala hunh man hi Khawzawl DC Instagram account kaltlangin live a pekchhuah a ni bawk a ni. 


Written by H. Lalramenga, SDC/EO, Khawzawl District